Laos-Japan Institute  |   ສະຖາບັນລາວ-ຍີ່ປຸ່ນ    |    ラオス日本センター

ໃນວັນທີ 24 ກັນຍາ 2020 ຜ່ານມານີ້, ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ (ສລຍ) ມະຫາວິທະຍາໄລແຫ່ງຊາດ(ມຊ) ໄດ້ຈັດພິທີສະຫຼຸບວຽກງານ ປະຈໍາສົກສຶກສາ 2019-2020 ແລະຜ່ານແຜນສົກສຶກສາ 2020-2021 ທີ່ຫ້ອງປະຊຸມສະຖາບັນ, ໂດຍການເຂົ້າຮ່ວມຂອງທ່ານ ສຈ. ປອ. ສົມສີ ຍໍພັນໄຊ ອະທິການບໍດີ ມຊແລະທ່ານ ຮສ. ປອ. ບຸນລ້ວນ ດ້ວງເງິນ ຜູ້ອຳນວຍການ ສລຍ. ມຊ, ຜູ້ຕາງໜ້າຈາກອົງການໄຈກາ ປະຈຳ ສປປ ລາວ ພ້ອມດ້ວຍພະນັກງານ, ແຂກຖືກເຊີນ, ຄູ-ອາຈານ ແລະນັກສຶກສາປະລິນຍາໂທ ເຂົ້າຮ່ວມ.

IMG 6367 Copy

     ໃນພິທີ ທ່ານ ຮສ. ປອ. ບຸນລ້ວນ ດ້ວງເງິນ ໄດ້ຜ່ານບົດສະຫຼຸບປະຈຳສົກສຶກສາ 2019-2020 ເຊິ່ງທ່ານໄດ້ຍົກໃຫ້ເຫັນສະພາບລວມຂອງ ສລຍ ທີ່ໄດ້ມີການພັດທະນາຈາກເມື່ອກ່ອນເປັນພຽງສູນຮ່ວມມືລາວ-ຍີ່ປຸ່ນ ເຊິ່ງເປັນການຮ່ວມມືລະຫວ່າງລັດຖະບານລາວ(ມະຫາວິທະຍາໄລແຫ່ງຊາດ) ແລະລັດຖະບານຍີ່ປຸ່ນ (ອົງການໄຈກາ) ແລະມີການບໍລິຫານຮ່ວມກັນ 2 ຝ່າຍ; ສລຍ ປະກອບມີທັງໝົດ 5 ພະແນກ ແລະ 2 ສູນ. ມີພະນັກງານທັງໝົດ 36 ຄົນ, ມີຊ່ຽວຊານປະຈຳ ຈາກປະເທດຍີ່ປຸ່ນ 4 ທ່ານ; ຕະຫຼອດໄລຍະສົກສຶກສາທີ່ຜ່ານມາ ສລຍ ໄດ້ຕັ້ງໜ້າປະຕິບັດວຽກງານຕ່າງໆ ແລະສາມາດສ້າງຜົນງານທີ່ພົ້ນເດັ່ນໃນຫຼາຍດ້ານ; ເປັນຕົ້ນແມ່ນການສ້າງຫຼັກສູດເຝິກອົບຮົມໄລຍະສັ້ນ ໃຫ້ແກ່ທັງພາກລັດ ແລະເອກະຊົນ, ສ້າງຫຼັກສູດຜູ້ບໍລິຫານຂັ້ນສູງຂອງບໍລິສັດ (Keiei-juku Program), ຈັດເວທີແລກປ່ຽນຂໍ້ມູນຂ່າວສານທາງທຸລະກິດ (Business Cafe) ເປັນຕົ້ນ. ຄຽງຄູ່ກັນນັ້ນ, ກໍຍັງໄດ້ຈັດຕັ້ງການຮຽນ-ການສອນ ພາສາຍີ່ປຸ່ນທັງໃນຫຼັກສູດປົກກະຕິ ແລະຫຼັກສູດພິເສດ ລວມເຖິງການຈັດກິດຈະອື່ນໆ ທີ່ເປັນການແລກປ່ຽນວັດທະນະທຳລະຫວ່າງ ລາວ-ຍີ່ປຸ່ນ. ສຳລັບສົກສຶກສາ 2019-2020 ມີຜູ້ສໍາເລັດການສຶກສາໃນລະດັບປະລິນຍາໂທ ສາຂາບໍລິຫານທຸລະກິດ ຈຳນວນ 31 ຄົນ ແລະໃນນັ້ນມີ 10 ຄົນໄດ້ຮັບຄັດເລືອກເປັນນັກສຶກສາດີເດັ່ນ.

     ໃນພິທີສໍາຄັນນີ້, ທ່ານ ສຈ. ປອ. ສົມສີ ຍໍພັນໄຊ ອະທິການບໍດີ ມຊ ໄດ້ມີຄວາມເຫັນ ແລະກ່າວສະແດງຄວາມຍ້ອງຍໍຊົມເຊີຍແກ່ນັກສຶກສາ ແລະໄດ້ເນັ້ນໜັກໃຫ້ ສລຍ ຍົກສູງຄຸນນະພາບ ໃນການພັດທະນາຊັບພະຍາກອນມະນຸດ ແລະການສຶກສາ, ຜັນຂະຫຍາຍວຽກງານວິຊາການ ແລະແບບແຜນການພັດທະນາຫຼັກສູດການຮຽນ-ການສອນໃຫ້ນັບມື້ນັບສູງຂຶ້ນກວ່າເກົ່າ.

IMG 6410 Copy