ສະຖາບັນລາວ-ຍີ່ປຸ່ນ     |    Laos-Japan Institute   |   ラオス日本センター

ຕອນບ່າຍວັນທີ 26 ກັນຍາ 2018 ນີ້, ສະຖາບັນຊັບພະຍາກອນມະນຸດ ລາວ-ຢີ່ປຸ່ນ(ສລຍ) ມຊ ແລະມູນນິທິຮອນດາ ໄດ້ຈັດພິທີມອບລາງວັນຮອນດາສຳລັບນັກວິທະຍາສາດ ແລະນັກວິສະວະກອນໝຸ່ມ ໃນ ສປປ ລາວ ປີ 2018 ຂຶ້ນທີ່ຫ້ອງປະຊຸມຂອງ ສລຍ ໂດຍການເປັນປະທານຂອງທ່ານ ຮສ. ປອ. ພຸດ ສິມມາລາວົງ ຮອງອະທິການບໍດີ ມຊ, ປະທານຄະນະກຳມະການຄັດເລືອກນັກສຶກສາເພື່ອຮັບລາງວັນ Honda Y-E-S ປະຈຳປີ 2018, ທ່ານ ສຈ. Akira Goto ຜູ້ອຳນວຍການຝ່າຍບໍລິຫານມຸນນິທິຮອນດາ, ທ່ານ Kazuhiro KUNO ອຸປະທູດຍີ່ປຸ່ນປະຈໍາ ສປປ ລາວ, ທ່ານ ສົມນຶກ ກຸສົນສະຫວັດ ຮອງຫົວໜ້າກົມກິດຈະການນັກສຶກສາ ກະຊວງສຶກສາທິການ ແລະກີລາ, ມີບັນດາແຂກທີ່ຖືກເຊີນ, ທ່ານຮອງຄະນະບໍດີ, ຫົວໜ້າຫ້ອງການ, ພ້ອມດ້ວຍພະນັກງານ, ຄູ-ອາຈານ ແລະນັກສຶກສາຈາກ ຄວສ, ຄວທ ແລະຄຊນ ເຂົ້າຮ່ວມ.

          ການມອບລາງວັນດັງກ່າວໃນຄັ້ງນີ້, ແມ່ນໄດ້ມອບຫຼຽນລາງວັນຊະນະເລີດໃຫ້ແກ່ 2 ນ້ອງຄື: ນາງ ທິດາທິບ ກຸນນາວົງ ນັກສຶກສາປີ 4 ສາຂາໄຟຟ້າພະລັງງານນ້ຳ ພາກໄຟຟ້າ ຄະນະວິສະວະກຳສາດ ແລະນາງ ວາດສະໜາ ທໍາມະວົງສາ ນັກສຶກສາປີ 4 ສາຂາວິຊາວິສະວະກຳສິ່ງແວດລ້ອມ ຄະນະວິສະວະກຳສາດ ທີ່ຜ່ານການຄັດເລືອກຕາມຂັ້ນຕອນທຸກປະການ. ໂຄງການ HONDA Y-E-S Award ເຊິ່ງເປັນໂຄງການທີ່ເປັນປະໂຫຍດໃນການພັດທະນາຊັບພະຍາກອນນຸດ ເຊິ່ງປີນີ້ເປັນປີທຳອິດທີມີ 3 ຄະນະເຂົ້າຮ່ວມຄື ຄະນະວິສະວະກຳສາດ, ຄະນະວິທະຍາສາດທໍາມະຊາດ ແລະຄະນະຊັບພະຍາກອນນ້ຳ ເຊິ່ງຜ່ານມາແມ່ນມີພຽງແຕ່ຄະນະວິສະວະກຳສາດເທົ່ານັ້ນທີ່ໄດ້ເຂົ້າຮ່ວມໂຄງການດັ່ງກ່າວ

ມາຮອດປັດຈຸບັນນີ້ແມ່ນເປັນປີທີ 11 ໃນຕະຫຼອດ 11 ປີ ຄັດເລືອກໄດ້ 22 ນ້ອງ, ຍິງ 11 ນ້ອງ. ກ່ອນການມອບລາງວັນ ທ່ານ ຮສ. ປອ. ພຸດ ສິມມາລາວົງ ໄດ້ກ່າວສະແດງຄວາມຍິນດີ ແລະຊົມເຊີຍຕໍ່ນັກສຶກສາທັງ 2 ນ້ອງ ທີ່ໄດ້ຮັບລາງວັນໃນປີ 2018 ນີ້, ທ່ານຍັງໄດ້ກ່າວສະແດງຄວາມຂອບໃຈຕໍ່ມູນນິທິຮອນດາ, ສະຖານທູດຍີ່ປຸ່ນປະຈໍາ ສປປ ລາວ, ກະຊວງສຶກສາທິການ ແລະກີລາ, ອົງການໄຈກາ, ບໍລິສັດຮອນດາປະຈຳ ສປປ ລາວ ທີ່ໄດ້ອຸປະຖ້ຳ ແລະສົ່ງເສີມນັກສຶກສາ ມຊ. ຜູ້ທີ່ຮຽນເກັ່ງ, ມີຄຸນສົມບັດດີ, ມີຫົວຄິດປະດິດສ້າງຜູ້ທີ່ຈະກາຍເປັນນັກວິທະຍາສາດ ໃນອະນາຄົດ.

          ໂອກາດດຽວກັນທ່ານ ສຈ. Akira Goto ຜູ້ອຳນວຍການຝ່າຍບໍລິຫານມຸນນິທິຮອນດາ ກໍໄດ້ຂຶ້ນມອບຫຼຽນ ລາງວັນໃຫ້ແກ່ 2 ນ້ອງທີ່ໄດ້ຮັບລາງວັນດັ່ງກ່າວຢ່າງສົມກຽດ, ຊຶ່ງລາງວັນທີ່ໄດ້ຮັບໃນຄັ້ງນີ້ແມ່ນເປັນເງິນຜູ້ລະ 3,000 ໂດລາສະຫະລັດ ແລະຍັງໃຫ້ທຶນໄປຮຽນຕໍ່ທີ່ປະເທດຍີ່ປຸ່ນອີກດ້ວຍ.

ຕອນທ້າຍພິທີ ທັງສອງນ້ອງກໍ່ໄດ້ກ່າວສະແດງຄວາມຂອບໃຈ ແລະຮູ້ບຸນຄຸນເປັນຢ່າງສູງມາຍັງມູນນິທິຮອນດາທີ່ໄດ້ມອບລາງວັນອັນມີຄຸນຄ່ານີ້, ຂອບໃຈມາຍັງຄະນະກຳມະການທີ່ຄັດເລືອກໃຫ້ເປັນຜູ້ຊະນະໃນການແຂ່ງຂັນໃນປີນີ້, ຂອບໃຈມາຍັງບັນດາຄະນະນຳຄະນະວິສະວະກຳສາດທີ່ຄັດເລືອກໃຫ້ເປັນຕົວແທນເຂົ້າຮ່ວມແຂ່ງຂັນ, ສະແດງຄວາມຮູ້ບຸນຄຸນມາຍັງບັນດາອາຈານທີ່ໄດ້ຖ່າຍທອດຄວາມຮູ້ໃຫ້ ແລະສຸດທ້າຍແມ່ນຂອບໃຈມາຍັງຄອບຄົວ, ອ້າຍເອື້ອຍນ້ອງ, ໝູ່ເພື່ອນທີ່ເປັນແຮງຜັກດັນ, ເປັນກຳລັງໃຈໃຫ້ພວກນ້ອງເຂົ້າຮ່ວມການແຂ່ງຂັນ ແລະສາມາດຍາດລາງວັນHONDA Y-E-S AWARD 2018 ນີ້ມາໄດ້.

More Release News

  • ຮຽນຮູ້ເລື່ອງວັດທະນະທຳຍີ່ປຸ່ນ

  • ເປີດແລ້ວຫ້ອງຮຽນພື້ນຖານພາສາຍີ່ປຸ່ນ B0

  • ເປີດຫຼັກສູດຝຶກອົບຮົມຜູ້ບໍລິຫານລະດັບສູງ ຮຸ່ນທີ 2

  • ເປີດຫຼັກສູດພັດທະນາຜູ້ປະກອບກິດຈະການໃໝ່ ຮຸ່ນທີ 2